کراچی سٹی کورٹ مال خانے سے اسلحہ کرائے پر لے کر وارداتیں کرنے والے پکڑے گئے

کراچی: شارع نورجہاں پولیس کی پاپوش قبرستان کے قریب کارروائی کرتے ہوئے دو انتہائی مطلوب ملزمان گرفتار کرلئے ہیں۔ ایس ایس پی سنٹرل ملک مرتضی کے مطابق گرفتار ملزمان میں شہر یار عرف معصوم بنگالی اور سعید بنگالی شامل ہیں جن سے اسلحہ برآمد کر لیا گیا ہے۔ ایس ایس پی نے بتایا کہ ملزمان نے 5 روز اقبال مارکیٹ 2 ماہ قبل سرجانی میں ہاوس ڈکیتی کی تھی جبکہ ملزم شہر یار عرف معصوم بنگالی نے حیدر آباد میں 6 کروڑ کی واردات کی تھی۔ انہوں نے بتایا کہ ملزم دس سال سزا کاٹنے کے بعد باہر آیا اور پھر جرم کرنے لگا ۔ اس اثنا میں ملزمان کے دوران تفتیش حیرت انگیز انکشافات سامنے آئے ہیں۔ ملزم کے بیان کے مطابق سٹی کورٹ مال خانے میں اسلحہ کرائے پر ملتا ہے اور خلیل نامی ساتھی مخصوص مدت کے لیے ملزمان کو اسلحہ فراہم کرتا ہے۔ ملزم نے بتایا کہ خلیل کو پستول کے لیے 8 ہزار روپے دیتا ہوں اور ڈکیتی کی وارداتوں میں خلیل بھی ساتھ جاتا ہے۔ یہی نہیں اگر پکڑے جائیں تو خلیل جعلی وکیل بن کر تھانے آ کر جوڑتوڑ بھی کرواتا ہے۔ ملزم نے مزید انکشاف کیا کہ سٹی کورٹ میں آنے والے کئی سرکاری افسران کی ٹپ دی اور ریکی کا کہا، خلیل کے کہنے پر سینٹرل میں کے الیکٹرک کے افسر کی ریکی کی۔ اعترافی بیان میں بتایا گیا کہ مفرور ملزم خلیل سزائے موت سے بھی بری ہوکر آچکا ہےجبکہ وہ کار لفٹنگ کی وارداتوں میں بھی ملوث ہے۔ ملزم نے مزید بتایا کہ ہمارے دیگر ساتھیوں کا تعلق ایم کیوایم لندن سے ہے۔